ശിഥിലം.....

എന്ന് മുതലാണ്‌ വെളുത്ത ചതുരത്തിലെ കറുത്ത അക്കങ്ങളെ ജാതിയും മതവും ചുവപ്പിച്ചത്... ?
എന്തിനാണ് ആഴ്ചയിലെ ദിവസങ്ങളെ ദൈവത്തിന്റെ പേരില്‍ പങ്കിട്ടെടുത്തത്..?

ചൊവ്വ ദേവിക്കും, വെള്ളി അള്ളാഹുവിനും, ഞായര്‍ ക്രിസ്തുവിനും വേണമെന്ന് ഏതു ദുസ്വപ്നത്തിലാണ് അവര്‍ വന്നു പറഞ്ഞത്‌....?

ഓണത്തിനും ക്രിസ്മസ്സിനുമുളള അവധികൾ പരീക്ഷാചൂടിൻറ്റെ കൂളിംഗ് ഓഫ് പിരിയഡാണെന്നാണെനിക്കു തോന്നിയിരുന്നത്....
ശിവരാത്രിയിൽ ഉറക്കമിളക്കുന്നത് കഥാപ്രസംഗം കേള്‍ക്കാനും മൂക്കുമുട്ടെ തിന്നാനുമാണെന്നാണ് ഞാന്‍ കരുതിയിരുന്നത് ..
വെള്ളിയാഴ്ചയിലെ ദീര്‍ഘമായ ഇടവേള കളിച്ചു തിമിര്‍ക്കാനായിരുന്നുവെന്നാണ് എനിക്ക് തോന്നിയിരുന്നത്..
ആറുദിവസത്തെ അദ്ധ്വാനത്തിന് ശേഷമുള്ള വിശ്രമദിവസമാണ് ഞായറെന്നാണ് ഞാന്‍ വിശ്വസിച്ചിരുന്നത്...
ഓണവും വിഷുവും ഈസ്റ്ററും ബക്രീദും, പുതിയ വസ്ത്രങ്ങളും ബിരിയാണിയും അച്ചപ്പവും പൂത്തിരിയും കൈനീട്ടവുമുള്ള ആഘോഷദിനങ്ങള്‍ മാത്രമാണെന്നാണ് ഞാന്‍ ധരിച്ചുവെച്ചിരുന്നത്..

ഈ വര്‍ണ്ണശോഭദിനങ്ങള്‍ക്കുമേല്‍ ദൈവത്തിന്റെയും മതത്തിന്റെയും ജാതിയുടെയും ഇരുട്ട് വീഴ്ത്തിയത് ആരാണ്..?
എന്തിനാണ്... ?
ആര്‍ക്കു വേണ്ടിയാണ്....

ഓണം എന്റ്റേയും, റംസാന്‍ നിന്റ്റേയും, ഈസ്റെര്‍ അവന്റ്റേയുമാവാതിരിക്കാന്‍ എന്നില്‍ നിന്ന് പടിയിറങ്ങിപോയ ആ മനുഷ്യനെ കണ്ടു പിടിച്ചെനിക്കു തിരികെ തരിക..

കാലമെന്ന യുഗപുരുഷാ, എനിക്കെന്നെ തിരിച്ചറിയാനുള്ള അറിവ് നല്‍കുക...

നീയെന്നെ വീണ്ടും മനുഷ്യനാക്കുക...

വെറും മനുഷ്യന്‍!!!